Sigpit

At muling babalik sa tinutuluyan kong maliit na sigpit

kung saan (wa)lang hanggan and pagtulo ng luha mula kisame

at basa, walang sawa ang kaingayan ng mga paniki,

sila lang ang nakakaalam ng lahat ng sakit at pighati

Ngunit narinig muli ang iyong musika

paano bang di lumapit, kung nandiyan ka na?

Pagod na sa mga sabit, puso ko'y isasara,

at kahit anong kalabit ay di kita papansinin

nanaman, di alam ano bang mangyayari saking hinliliit

buhat niya ang pangako na aking ginawa na kailanman di

ako mawawalay sayo sa biglaang pagtago, na magbibigay daan sa aking paglaho

nasabi ko naman, pagpasensyahan mo lang na ito ang aking nakasanayan

Ngunit di mo tinigil ang iyong musika

sinubukan mo pa ring tanungin kung pwede bang

Muli kong kausapin ka tungkol sating dalawa

mga pangakong kay dali lang nalimutan

Sa ating huling usapan sinadyang magkaaminan

at di ko inaasahang nagawang harap-harapan

Sabi mo mayroong saysay ang ating munting salaysay

ngunit di naagapan ng oras, nangyari na ang lahat.

At nang marinig muli ang iyong musika,

parang di ko na kayang magpaalam pa

sabi nga ni bathala di ngayon ang tinakda

balang araw ay sana maiisayaw kita