O virgo prudentissima
ANGIOLO AMBROGINI POLIZIANO, JAMES MACMILLAN
O virgo prudentissima,
quam caelo missus Gabriel,
supremi regis nuntius,
plenam testatur gratia.
Te sponsam factor omnium,
te matrem Dei Filius,
te vocat habitaculum
suum beatus spiritus.
Tu stella maris diceri
quae nobis inter scopulos,
inter obscuros turbines
portum salutis indicas.
Per te de taetro carcere
antiqui patres exeunt
per te nobis astriferae
panduntur aulae limina.
Audi, virgo puerpera,
et sola mater integra
audi precantes, quaesumus,
tuos Maria servulos.
Repelle mentis tenebras,
disrumpe cordis glaciem.
Nos sub tuum praesidium
confugientes protege.
Alleluia.