Heilig Abend (Stimmungsvolles bayerisches Weihnachtslied)

Im Dorf is so staad
Die Weg und die Straßen san verwaht
Schau, wia da Schnee abafoit
Auf die Wiesn, auf die Felder, auf’n Woid

Schau, wia die Kinder beim Fenster rausschau‘n
Des Voglhaus hat a weiße Haub‘n
‘S werd dunkl und schee langsam werd’s Zeit
Es is alles irgendwie anders heit

‘S is Heilig Abend auf’m Land
Scheene Weihnacht’n
D’Leit geb’n sich d’Hand
Heilig Abend auf’m Land
D’Kirch is scho
Im Christmett’n-G‘wand

Im Stall fressen Kiah eahna Hei
Die Kinder de füttern heit ei
Am Fenster san Eisbleame dro
D’Katz suacht a Platzerl im Stroh

In da Küch bruzzeln d’Äpfel in da Röhrn
Am Christbaum dro hängen scho Stern
Es riacht nach Orangen, Nelken und Zimt
Ins Kripperl no a Liachtl fürs Kind

‘S is Heilig Abend auf’m Land
Scheene Weihnacht’n
D’Leit geb’n sich d’Hand
Heilig Abend auf’m Land
D’Kirch is scho
Im Christmett’n-G‘wand