Johan

Gahn ideelos durchs Lebe weiss ned wasi schribe söt
Min Chopf isch leer was sölli sege es fühlt sich ah wie schlechti Giigetön
Ich gah use go spaziere sueche öpis woni fiire söt
Doch ich fiire ned
ich lig is grüene Gras und lueg de Wulche zue wies tanzed
Die gseht us wie eh Chatz die ander wie en Panzer
Ich stah uf und laufe wiiter gsehn en Knacker mitme riise Ranze
Frög mich was isch sini Gschicht - was her er scho erlebt
Het er en Sohn und eh Tochter und eh Frau wo nümme lebt
Eh fetti Hütte amne See und eh Yacht wo nur no am Steg chläbt
Frög mich was er alles gseh het im Lebe
Ich bin no viel z jung zum sege
Irgendwie ischs en Säge
Er het gmerkt das ich ihn ahluege ich wird es Bitz verlege
Er chunt zu mir übere und ich wot grad sorry sege
Er seit hallo min Sohn seg mer doch din Name
Er würkt eigentlich ganz nett darum seg ich ihm min Name
Ich heisse Siro was isch dine
Johann hetter gseit und ich fang es bitz ah grinse
Eus trenned 60 Jahr oder meh was söll eus scho verbinde
Und denn fangt er ah verzelle vo sinere Frau und sine Chinde
Sie sind alli no am lebe by the way ich bin es bitz am trippe
Anyways - er het di ganzi Welt gse
Er isch überall gsi
In Amerika gebore
Kämpft im Vietnam Chrieg
Ich bin komplett fokusiert
Sini Lebensgschicht sie zieht
Und denn het er sich verliebt
Maria het sie gheisse
Und zemme sinds go reise
Asie, Afrika, Europa alles hend sie gseh
Di Arme und di Riiche
Di Dumme und di Gschiide
Di Grosse und di Chliine
Ich luege ihm is gsicht und er würkt eigentlich ganz z friede
Ich los ihm zue und frög mich wo ich selber higah
Ich bin no so jung und plötzlich gseh ich wie no s ganze Lebe vor mir staht und ich merke es isch nonig z spaat
Ich gnüss die Gschichte und die Ziit mit em Johan
Mir sitzed unternere Fichte er verzellt mer sini Gschichte
Ich und de Johan
Er het so viel z'brichte so vieli alti Gschichte
Mich neue alte Fründ de Johan
Irgendwenn seit er mitem Alter chunt Weisheit und mit Weisheit chunt de Friede
Viellicht hesch bis denn eh Frau oder bisch scho 3 Mal gschiede
S'Wichtigst isch das du am End chasch sege du misch immer bodeständig blibe
Hör uf zwiifle, fang ah believe
Denn du bisch es Meisterwerk
Dini eigne Gfühl die sind am meiste Wert
Ih dim eigne Königriich sind Sorge wiit entfernt und die bliibet det
Jetzt weiss ich plötzlich wieder was ich schriibe wet
Ich wot Liecht ine dunkli Welt bringe
Tracks schriibe zum mitsinge
Mensche wo ned wiiter wüssed öpis biibringe
Und mit ihne Ziit verbringe
Ich verabschiede mich vom Johan, sege dankeschön
Und wie sich eusi Wäg trenned frög ich mich ob ich ihn irgendwenn mal wieder gsehn
Erst jetzt merk ich, wie lang mir gredet hend denn d'Sunne isch scho lang go schlafe
Ich lig im Bett und seg no eimal danke
Denn mach ich mini Auge zue und gah au go schlafe