Grand Hotel

La mia nona la m'ha dii che pudèvi fa carriera
Al Grand Hotel
E una volta a Sofia Loren g'ho verdüü anca la purtéra
I henn mea ball
La gh'era sö un prufoemm che parèva primavera
L'antivigilia de Nataal
El diretuur emuziunaa l'ha perdüü anca la dencéra
Giò in de la hall
El mè ziu sarà veent'ann che'l lavùra là in cüséna
Al Grand Hotel
Una vita col filetto al pepe verde e'l maa de schèna
E cul curtèll
El fa balà tücc i pügnàtt l'è giamò ciucch alla matèna
Te tuca vedèll
Quaand'el tö giò la medesèna el g'ha el cervèll in altalèna
Ma l'è'l sò bèll

Sèmm tücc fiöö de questa scalinada
Che urmai cugnussum basèll per basèll
Tücc bei vestii cumè suldaritt de tòla
Cun't el baretén de stüpid e quaivön cun't el gel
E i turisti cun la bùca sbaratàda
Quand che rüven sö la porta de entràda
E me una quaj valìsa l'ho purtàda,
Una quaj mancia l'ho ciapàda, al Grand Hotel

Quand che l'è el desdòtt de magg rüva sempru la Cuntessa
Al Grand Hotel
La g'ha quasi nuvant'ann e de murì la g'ha mea pressa
E l'è nurmaal
El sò omm l'era un playboy e l'ha basaa anca la Vanessa
Lé suta i scaal
L'è finii senza un butòn insèma a una certa duturessa, al'uspedaal

E innanz e indree, sö per i scaal
Giò per i scal, sempru de cursa, nèta la scarpa
Che gh'è scià anca el diretuur
E curr de scià e curr de là, cume un ratt cun la divisa
Sempru in man 'na quaj valìsa che però l'è mai la mia
Un bell suriis alla francesa e alla dunètta inglesa
Piugiàtt de la malùra un quaj desmìla el rüverà
Te fann südà, ma guai se te spüzzet
Te fann sultà, ma guai se te bùfet
E veert quela porta che g'ho scià el Moesciandòn
Altrimenti el bevi me e te lassi che dumà el büsciòn

Sèmm tücc fiöö de questa scalinada
Che urmai cugnussum basèll per basèll,
Tücc bei vestii cumè suldaritt de tòla
Cun't el baretén de stüpid e quaivön cun't el gel
E i turisti cun la bùca sbaratàda
Quand che rüven sö la porta de entràda
E me una quaj valìsa l'ho purtàda,
Una quaj mancia l'ho ciapàda, al Grand Hotel

E una dona cume lee l'eri pròpi mai vedüda al Grand Hotel
La m'ha dii che in vita sua nissön l'era purtada in söl batèll
Me gh'eri el cöör de dree ai urècc e la fàcia imbalsamada
Lé suta i stell
La g'ha impiegaa tüta la nocc per dimm che l'era
Innamurada, del me fredèll

Sèmm presunée de questa scalinàda
Che maledissum basèll per basèll
Gh'emm un suriis che sta insèma cun la còla
L'entusiasmo alla moviola e quindes chili de bàll
E i turisti cun la facia incazzada
Quand che tröven la machina sfrisàda
E me la sua Mercedes l'ho sbüsàda
E me la sua mancia l'ho mea vurüüda
E me la sua valìsa l'ho lassàda, al mè fredèll