وقفة ناصية زمان

إنت فاكر رمضان؟ كان الناس بـ
تعلق زينة
تعلق زينة وبتحط ساعات نشارة ملونة
كنت لسة هقول لك عليها
وبيجوا بواحد يعمل فريم أبيض بدقيق ولا بجبس ويرسم جوة
ده كان فن حبل النور فيشته كانت بتتوزع كل يوم على شقة
إنت فكرتني بدي كانت رهيبة برضه آه، ليها معنى كبير
طبعا ماحدش يشيل لوحده الطبق اللي دايما طالع نازل في كل شقق العمارة
آه طبق هو بيجي لك وبيترد وتوديه وييجي لك
وتعمل إنت حاجة تملاه و تبعته ويرجع لك ثاني دي كانت جميلة
دلوقتي الموتوسيكل يخش ع البنت عليه ثلاتة يخشوا ويقلبوا شنطتها
يقلبوها من دراعها وياخدوا منها أي حاجة
ممكن يقرصوها أصلا، من غير أي سبب، ولا عملوا حاجة، ولا خليوا من
ولا خليوا من الحاجة
زمان البنت وهي مروحة كانت أول ما بتخش المنطقة
خلاص كأنها دخلت البيت، بالضبط، آمان

والدار أمان، الدار أمان
فاكرين ولا، فاكرين ولا، ولا نقول كمان

وقفة ناصية زمان إدتنا إزاي نملك لسان
موزون بيلاغي الصايع والضايع والجنتلمان
كله سيان، قابلنا كل أنماط جنس الإنسان
وإتعاملنا فإتبنى جوا الدماغ بوصلة وميزان
في جزء الثانية بنعرف نفقس مين جدع ومين جبان
ومين بقلب مات وأسود ومين قلبه بينبض حنان
ومين تشوفه تقول ده هادي ولو نكشته تشوف جنان
ومين غلبان ومين شيطان وجن وقرد وبهلوان
حتى الشقاوة ع الناصية كان ليها أصول
الخناق راجل لراجل مش راجل قصاد أسطول
كات وصمة عار كبيرة إنك تضرب واحد من الظهر
حصل هيحصلك عارك ويوصلك للقبر
ما كانش العادي من القوي بيكسر الأضعف منه
تحس الكل كان مؤمن إن القوي في الأقوى منه
من أول محترم شقي حتى المجرم كمان
الكلام ده شفته بعيني في وقفة ناصية زمان
كنا عزوة للحتة، الناس وقفتنا تحبها
ياما وقفات دلوقتي الناس تتمنى هدها
ألفاظ شمال بصوت عالي وحشيشها فايح منها
إزاي ولاد الحتة يبقوا هما مصدر همها

كان يا ما كان وقفة ناصية زمان
كان يا ما كان

وقفة الناصية إتعلمنا فيها كثير لغات
السوعلمون كانت لغة بنرغي بيها لساعات
لو في غريب ما بينا ومش عاوزين يفهم معنى الحاجات
ساسب حواجب سفهم يتنيل ساجة حالات
وفي كمان لغات جسد سبيل مثال
دي العيدية، ودي الجيزة فوق الكوبري، ودي الطالبية
ودي الثلاث طوابق اللي ناسها مية، مية
وده الهرم ودي نفض، ودي صبرك عليّ
وقفة الناصية كانت زي النادي تمام
إتعلمنا فيها هواية إن كانت كلاب أو كان حمام
وقت الرغي في الهواية ما بيخلصش فيه الكلام
ما فيش فلوس، عادي برضه ما بتموتش الأحلام
عملنا بإيدينا ملعب غية وطبلية وجيم
الحاجة أم الإختراع إسعى إتوكل تتم
ما كانش فيه آيباد تابلت واتساب فيسبوك واكلينلي يومي
يومي كله كان خبرات بشر من فجري لحد نومي
مش معزول ومنطوي قدام شاشات وبالساعات
لا وسط ناس ومجتمع بشارك فيه بكثير حاجات
ياما حلينا ع الناصية كتير مشاكل وحوارات
أخد الحق حرفة تبات ولعة تصبح رماد

على وضعك يا عم مكي
يا ليلي، يا ليلي يا عيني يا ليلي
منطقتي هي الطالبية
يا ليلي يا عيني يا ليلي يا ليل

يا ليلي، يا ليلي يا عيني يا، يا ليلي
يا ليلي يا عيني يا ليلي يا، يا، يا عيني

فاكرين ولا، فاكرين و لا، ولا أقول كمان